வாக்கு எண்ணும் பணியில் 17 ஆயிரம் பேர்

தமிழக சட்டப் பேரவைத் தேர்தலில் பதிவான வாக்குகளை எண்ணும் பணியில் 16 ஆயிரத்து 966 பேர் ஈடுபடுத்தப்பட உள்ளனர். தலைமைத் தேர்தல் அதிகாரி உட்பட அனைவருக்கும் அடையாள அட்டை வழங்கப்பட்டுள்ளது. அடையாள அட்டை உள்ளவர்கள் மட்டுமே வாக்கு எண்ணும் மையத்துக்குள் அனுமதிக்கப்படுவர் என தேர்தல் ஆணையம் உறுதிபட அறிவித்துள்ளது. தமிழக சட்டப் பேரவைத் தேர்தல் வாக்குப் பதிவு கடந்த மாதம் 13 ஆம் தேதி நடந்தது. தேர்தலுக்குப் பயன்படுத்தப்பட்ட வாக்குப் பதிவு இயந்திரங்கள் அனைத்தும் தொகுதி வாரியாக 91 மையங்களில் வைக்கப்பட்டுள்ளன. வாக்கு எண்ணிக்கைக்கான ஏற்பாடுகள் குறித்து, சென்னை புனித ஜார்ஜ் கோட்டையில் செய்தியாளர்களை புதன்கிழமை சந்தித்தார், தமிழக தலைமைத் தேர்தல் அதிகாரி பிரவீண் குமார். அப்போது அவர் கூறியது: வாக்கு எண்ணும் பணியில் பார்வையாளர்கள் உட்பட 16 ஆயிரத்து 966 பேர் ஈடுபடுத்தப்பட உள்ளனர். பாதுகாப்புப் பணியில் வெளி மாநிலங்களைச் சேர்ந்த துணை ராணுவப் படையினர் 4,500 பேர் ஈடுபடுகின்றனர். துணை ராணுவப் படையினர் 2,700 பேர் ஏற்கெனவே பணியில் உள்ளனர். மீதமுள்ளவர்களில் 900 பேர் சென்னையிலும், 500 பேர் திருச்சிக்கும், 400 பேர் மதுரைக்கும் செல்கின்றனர். எந்தப் பொருட்களுக்கு அனுமதி: வாக்கு எண்ணும் மையத்தில் இருந்து 100 மீட்டர் தூரத்துக்குள் வாகனங்கள் ஏதும் அனுமதிக்கப்பட மாட்டாது. தலைமைத் தேர்தல் அதிகாரி உட்பட அனைவருக்கும் அடையாள அட்டை அளிக்கப்படும். அவர்கள் மட்டுமே வாக்கு எண்ணும் மையங்களுக்குள் செல்ல அனுமதிக்கப்படுவர்.
மை பேனா, சிகரெட், தீப்பெட்டி, லைட்டர் போன்ற பொருட்களுக்கு அனுமதி கிடையாது. செய்தியாளர்கள், வேட்பாளர்கள், அவர்களின் தலைமை முகவர்கள், தேர்தல் நடத்தும் அதிகாரிகள் ஆகியோர் மட்டுமே செல்போன்களை வைத்துக் கொள்ளலாம். அவர்கள் வாக்கு எண்ணும் மையங்களுக்குள் இஷ்டம் போல பேச முடியாது. குறிப்பிட்ட இடங்கள் அதற்கென ஒதுக்கப்படும். தேர்தல் பார்வையாளர்கள் மட்டும் வாக்கு எண்ணும் அறைகளில் செல்போன் வைத்துக் கொள்ளலாம்.
ஒவ்வொரு சுற்று முடிவும்... வாக்கு எண்ணிக்கை வெள்ளிக்கிழமை காலை 8 மணிக்குத் தொடங்குகிறது. முதலில், தபால் வாக்குகள் எண்ணப்படும். அரை மணி நேரம் கழித்து மின்னணு வாக்குப் பதிவு இயந்திரங்களில் பதிவான வாக்குகள் எண்ணப்படுகின்றன.
ஒவ்வொரு தொகுதியிலும் பதிவான வாக்குகள் 14 மேசைகளில் வைத்து எண்ணப்பட உள்ளன. ஒவ்வொரு சுற்று வாக்கு எண்ணிக்கை விவரங்கள் கையாலும், கணினியிலும் பதிவு செய்யப்படும். மூன்று வகைகளில் ஒவ்வொரு சுற்றின் முடிவும் அறிவிக்கப்படும்.
ஒவ்வொரு சுற்றின் முடிவிலும் வாக்கு எண்ணிக்கை விவரங்கள் அறிக்கை வடிவில் தயாரிக்கப்படும். அது, செய்தியாளர்களின் அறைகளுக்கும், வேட்பாளர்களுக்கும் கொடுக்கப்படும். "மைக்' மூலம் அறிவிக்கப்படும். கரும்பலகையிலும் எழுத அதிகாரிகள் அறிவுறுத்தப்பட்டுள்ளனர்.
தபால் வாக்குகள்: கடைசி இரண்டு சுற்றுகளுக்கு முன்னதாக தபால் வாக்குகள் அனைத்தும் முழுமையாக எண்ணி முடிக்கப்பட வேண்டும். அப்படி எண்ணப்படாவிட்டால், கடைசி இரண்டு சுற்றுகளின் எண்ணிக்கையும் நிறுத்தப்படும். தபால் வாக்குகள் எண்ணப்பட்ட பிறகு கடைசி சுற்றுகளின் இரண்டு சுற்றுகள் எண்ணப்படும்.
ஒரு வேட்பாளர் ஒரு லட்சம் வாக்குகளும், அவருக்கு அடுத்தபடியாக மற்றொரு வேட்பாளர் 99 ஆயிரம் வாக்குகளும் பெற்றிருந்தால் இருவருக்கும் இடையிலான வித்தியாசம் ஆயிரம் வாக்குகளாக இருக்கும். இந்தச் சூழ்நிலையில், தபால் வாக்குகள் 2 ஆயிரமாக இருக்கும்பட்சத்தில் அந்த வாக்குகள் தீவிரமாக மறுஆய்வு செய்யப்படும். விடியோ மூலம் பதிவு: ஒவ்வொரு மேசையிலும் வாக்குகளை எண்ணும் நடவடிக்கைகள் வெப் கேமரா மூலம் கண்காணிக்கப்படும் என தேர்தல் ஆணைய அதிகாரிகள் தெரிவித்து இருந்தனர்.
வெப் கேமரா வழியாக பிடிக்கப்படும் படம் தெளிவானதாக இருக்காது என்ற நிலையில் அனைத்து நடவடிக்கைகளும் விடியோ மூலம் படம் பிடிக்கப்படும் என்றார் பிரவீண் குமார். செய்தியாளர்கள் சந்திப்பின் போது கூடுதல் தலைமைத் தேர்தல் அதிகாரிகள் அமுதா, ராஜேந்திரன் ஆகியோர் உடனிருந்தனர்.
"மிகவும் திருப்தி அளிக்கிறது' தேர்தலை சிறப்பாக நடத்தி முடித்தது தனக்கு மிகவும் திருப்தி அளிப்பதாக தலைமைத் தேர்தல் அதிகாரி பிரவீண் குமார் தெரிவித்துள்ளார். ""பொது மக்கள், ஊடகங்கள், அரசுத் துறை அதிகாரிகள் என அனைத்துத் தரப்பினரின் ஒத்துழைப்புடன் அசம்பாவித சம்பவங்கள் ஏதுமின்றி வாக்குப் பதிவு நடந்தது. இது எனக்கு மிகவும் திருப்தி அளிக்கிறது'' என்றார் அவர். தேர்தல் ஆணையத்தின் நடவடிக்கைகளை முதல்வர் கருணாநிதி உட்பட அரசியல் தலைவர்கள் விமர்சனம் செய்தது தொடர்பான கேள்விக்கு பதிலளித்த பிரவீண் குமார், ""தேர்தல் ஆணையத்தின் விதிகள், சட்டங்கள் என்னவோ அவை அமல்படுத்தப்பட்டன. புகார்கள் அளிக்கப்படும் போது அவற்றை எந்தக் கட்சி கொடுக்கிறது என பார்க்கவில்லை. தேர்தல் நடத்தை விதிகளை மீறினால் நடவடிக்கை எடுக்கப்பட்டது'' என்றார் அவர்.